Minnerheitensekretariat

De Grenz twüschen Sleswig-Holsteen un Däänmark warrt een meist nich wies. Vele Minschen snackt düütsch un däänsch. In dat Bunnsland ganz in’n Noorden vun Düütschland leevt üm un bi 50.000 Lüüd, de to de däänsche Minnerheit dorto höört un düütsche Börgers sünd. Se sünd goot opstellt un hollt Kuntakt na uns Naverland Däänmark.

Vele vun jüm sünd in de Grenzstadt Flensborg, in de Kreisen Noordfreesland un Sleswig-Flensborg un in’n Noorden vun den Kreis Rendsborg-Eckernföör tohuus. De däänsche Minnerheit sülvst seggt, jümehr Lüüd wahnt in Süüdsleswig. Op de anner Siet leevt en düütsche Minnerheit in Noordsleswig in’t Königriek Däänmark. 

Dat gifft en ganze Reeg grote Organisatschonen, de dat mööglich maakt, dat de däänsche Minnerheit jümehr Kultur un Traditschonen an’t Leven hollen kann. De Sydslesvigsk Forening (SSF) – de Süüdsleswigsche Vereen – is de wichtigste Kulturorganisatschoon. Mit jümehr egen Partei, den Süüdsleswigschen Wählerverband (SSW), sitt de däänsche Minnerheit in den Landdag in Sleswig-Holsteen. Siet de Landdagswahl 2012 sünd se ok mit en Ministersche in de Kieler Lannsregeren dorbi.

"Europapolitik is Minnerheitenpolitik"

För de däänsche Minnerheit is dat heel un deel wichtig, dat jeedeen Minsch sik sien Natschonalität un Kultur free utsöken kann. Un jeedeen schall dat respekteren – so as dat begäng is in en Demokratie un so as dat „Rahmenübereinkommen zum Schutz nationaler Minderheiten“ un de Europääsch Sprakencharta dat vörschrievt. För de däänsche Minnerheit is kloor: „Europapolitik is Minnerheitenpolitik un Minnerheitenpolitik is Europapolitik“.

Hier finnt Se mehr:

• Sydslesvigsk Forening
• Südschleswigscher Wählerverband (SSW)
• Sydslesvigs danske Ungdomsforeninger (Däänsche Jugendverbänn in Süüdsleswig)
• Dansk Skoleforening for Sydslesvig (Däänsche Schoolvereen)
• Dansk Centralbibliotek for Sydslesvig (Däänsche Zentralbibliothek)
• Dansk Kirke i Sydslesvig (Däänsche Kark in Süüdsleswig)
• Dansk Sundhedstjeneste for Sydslesvig e.V. (Däänsche Gesundheitsdeenst)
• Flensborg Avis (däänsch-düütsch Dagblatt)
• Staatskanzlei Sleswig-Holsteen: Hier geiht dat üm Minnerheitenpolitik
• Bunnsbinnenministerium över die däänsche Minnerheit