Manerheedekontoor

Et tjüsch grüngesäts ferbüt arks form foon diskriminiiring aw grün foon spräke unti hiimstoun än jurtkamst (artiikel 3, oufsats 2, seeting 1 grüngesäts). Deertu san da gesätse, e ferwålting – aw arks schuchte – än da geruchte bünen. Et jeeft nån äinen manerhäideartiikel önjt grüngesäts. Di manerhäiderädj seet ham sunt hu iiringe deerfor in, dåt en manerhäideartiikel önjt grüngesäts apnümen wårt.

Ouder bundesrucht: bundeswoolrucht än partaierucht

Uk önjt bundeswool- än dåt partaiegesäts jeeft et keere for e schööl än e stipe foon da manerhäide. 

Jü sü nåmd fiiwprosäntklausel, weer bai e wool tu e bundesdäi bloots partaie inkaame, wat tumanst fiiw prosänt foon da tweedstime unti önj tra woolkrise diräktmandoot foue, jült ai for partaie foon da nasjonååle manerhäide (§ 6 Abs. 3, seeting 2 Bundeswoolgesäts). Önjt bundeswoolgesäts san ekstraräigle for da kriskandidoote än da loonsliste (§ 20 Abs. 2 seeting 3, § 27 Abs. 1 seeting 4).

Önje partaiegesäts foon e bund wårde da partaie foon da nasjonååle manerhäide bait stootlik partaiefinanse än uk bait insoomeln foon giilj üt et ütlönj priwilegiird.