Sekretariat mjeńšynow
 tych styri awtochtonych narodnych mjeńšynow
 a ludowych kupkow Nimskeje

W lěśe 2005 jo se za zwězki narodnych mjeńšynow w Nimskej zarědował w Barlinju Sekretariat mjeńšynow. Sekretariat mjeńšynow ma slědujuce nadawki a funkcije:

• zwězujuca instanca pśipóznatych narodnych mjeńšynow k zwězkowym organam Zwězkowy sejm, zwězkowe kněžarstwo ako teke Zwězkowa rada, wósebnje źiwanje a pśewóźowanje parlamentariskego źěła zwězka a jogo wuběrkow  z glědanim na nastupnosći a problemy
• woplěwanje kontaktow ako teke pśedstajenje pozicijow tych styrich pśipóznatych narodnych mjeńšynow napśeśiwo wuběrkam Zwězkowego sejma, wótpósłańcam Zwězkowego sejma, frakcijam, kněžarstwoju a ministerstwam,
• zastupowanje zajmow tych styrich pśipóznatych narodnych mjeńšynow pśi wuwjeźeńskich póstajenjach ku kaznjam a pśizwólenjam,
• wuźěłanje zgromadnych stojnišćow a pósuźowanjow mjeńšynowych organizacijow,
• zjawnostne źěło k temam, kenž pótrjefje nastupnosći mjeńšynoweje politiki, rěcy, kultury, wšobocne informacije wó narodnych mjeńšynach a narodnostnej politice w Nimskej,
• zastupowanje mjeńšynowych zwězkow w narodnych a mjazynarodnych gremijach, mjazy drugim 
  • zastupujucy cłonk w pśiraźe “Zwězkowa antidiskriminěrujca instanca” (ADS)
  • zastupnik mjeńšynowych organizacijow na “Implementěrowańskich konferencach OSZE k cłowjeskej dimensiji”
  • pśigranjański partnaŕ za doglědowańske gremije mjeńsynoweje politiki Europejskeje rady
• funkcija sekretariata za Mjeńšynowu radu tych styrich pśipóznatych awtochtonych narodnych mjeńšynow w Nimskej

Wjednik sekretariata mjeńšynow Nimskeje jo Gösta Nissen.

Sekretariat mjeńšynow ma swój běrow pśi Bundesallee 216-218 w Barlinju a se spěchujo wót Zwězkowego ministerstwa nutśikownego.